لاہور: (مانیٹرنگ) نومنتخب امریکی صدر ڈونلڈ ٹرمپ نے اعلان کیا ہے کہ وہ بطور صدر آئین کی ہدایات کی پابندی کرتے ہوئے سالانہ کم از کم ایک ڈالر تنخواہ وصول کریں گے۔ آئیے یہاں دیکھتے ہیں کہ دنیا کے دیگر ممالک کے سربراہان کی تنخواہ کتنی ہے۔

باراک اوباما
موجودہ امریکی صدر باراک اوباما کی ماہانہ تنخواہ 32 ہزار 916 ڈالرز ہے۔ غیر ملکی ویب سائٹ کے مطابق اس تنخواہ کو اگر سال کے 12 مہینوں سے ضرب کیا جائے تو اوباما کی سالانہ تنخواہ 3 لاکھ 95 ہزار بنتی ہے۔

انجیلا م

یورپ میں اقتصادی طور پر سب سے زیادہ مضبوط ملک جرمنی کی چانسلر اور اوباما کی قریبی دوست اینجلا مرکل اس فہرست میں دوسرے نمبر پر ہیں۔ 1954ءمیں پیدا ہونے والی جرمن چانسلر کی ماہانہ تنخواہ 20 ہزار 778 امریکی ڈالرز جبکہ سالانہ تنخواہ 2 لاکھ 49 ہزار 341 ڈالرز بنتی ہے۔
ولادیمیر پیوٹن
ولادیمیر پیوٹن کی سربراہی میں روس نے بہت ترقی کی۔ انہوں نے سوویت یونین کا شیرازہ بکھرنے کے بعد روس کو اقتصادی طور پر مضبوط کرنے میں بہت اہم کردار ادا کیا۔ آج روس دوبارہ چین کے ساتھ مل کر نیو ورلڈ آرڈر تشکیل دینے کی پلاننگ کر رہا ہے۔ ایک اندازے کے مطابق روسی صدر کی ماہانہ تنخواہ 11 ہزار 311 امریکی ڈالرز ہے جو سالانہ ایک لاکھ 35 ہزار 736 ڈالرز بنتی ہے۔
برطانوی وزیر اعظم تھریسا مے
بریگزیٹ ریفرینڈم کے بعد اپنے عہدے سے سبکدوش ہونے والے برطانوی وزیر اعظم کی جگہ اب خاتون رہنماء تھریسا مے نے یہ منصب سنبھالا ہے۔ اپنے حالیہ بیان میں انہوں نے کہا ہے کہ بریگزیٹ برطانیہ اور یورپی یونین دونوں کے مفاد میں ہے۔ بریگزیٹ کے لیے قانون کارروائی اگلے سال مارچ میں شروع ہو گی۔ ایک اندازے کے مطابق تھریسا مے کی ماہانہ تنخواہ 17 ہزار 320 امریکی ڈالرز ہے۔ اس تنخواہ کو اگر سال کے 12 مہینوں سے ضرب دی جائے تو یہ دو لاکھ سات ہزار 836 امریکی ڈالرز بنتی ہے۔
شی جن پنگ
پاکستان کے برادر ملک چین کے صدر شی جن پنگ کی سربراہی میں ان کا ملک دن دوگنی رات چوگنی ترقی کی منازل طے کر رہا ہے۔ پاک چائنہ اقتصادی راہداری منصوبے کی تکمیل کے بعد چین کی معیشت کو سالانہ اربوں ڈالرز فائدہ پہنچے گا، تو وہیں پاکستان کو بھی اس کے ثمرات پہنچیں گے۔ غیر ملکی ویب سائٹ کے مطابق چینی صدر شی جن پنگ کی ماہانہ تنخواہ ایک ہزار 734 جبکہ سالانہ تنخواہ 20 ہزار 806 امریکی ڈالرز بنتی ہے۔
فرانسس اولاندے
فرانس کے صدر فرانسس اولاندے روزانہ 554 ، ہفتہ وار 3 ہزار 890، ماہانہ 16 ہزار 856 ڈالرز کے حساب سے سالانہ دو لاکھ دو ہزار 270 امریکی ڈالرز کی تنخواہ اپنی حکومت سے وصول کرتے ہیں۔
جسٹن ٹروڈو
1971ء کو پیدا ہونے والے کینیڈا کے نوجوان وزیر اعظم جسٹن ٹروڈو عالمی دنیا کےابھرتے ہوئے رہنماء تصور کئے جاتے ہیں۔ ٹروڈو حالیہ انتخابات میں اپنے مدمقابل کو شکست دے کر کینیڈا کے وزیر اعظم منتخب ہوئے ہیں۔ ایک اندازے کے مطابق جسٹن ٹروڈو کی ماہانہ تنخواہ 21 ہزار 894 امریکی ڈالرز ہے جو سالانہ 2 لاکھ 62 ہزار 725 امریکی ڈالرز بنتی ہے۔