لاہور(مانیٹرنگ رپورٹ)چینل24 تے گل بات کردے ہوئے عمران خان دے وڈے سپورٹر تے ون۔مین فورس شیخ رشید ہمش وانگ پکا جیہا منہ بنا کے اک وڈا بیان دین دی کوشش کیتی۔ انہاں اپنے ولوں بڑی مہارتاں نال بیان دتا کہ ایس فیصلے پاروں یا قنون دا جنازہ نکلے گا یا ”ن“ دا جنازہ نکلے گا۔اوہ ایس بیان نال کس نوں ”تڑی“ لا رہے نیں ایہہ سب نوں سمجھ آرہی ہے۔فیصلہ تے ججاں کرنا ہے اتے فیصلے توں پہلاں اجہے دھمکی والے بیان دینے اک بھیڑی ریت ہے پر شیخ رشید ہورے آپ نوں بہوں وڈا سمجھدے نیں۔ اک پاسے شیخ ہو

راں عدالت نوں ”تڑی“ لائی تے دوجے پاسے اوسے پروگرام وچ جداں اینکر سید علی حیدر پچھیا کہ جے فیصلہ تہاڈے خلاف آیا تے کیہہ کرو گے؟ایس تے شیخ ہوراں فرمایا اساں پچھے ہٹن والے نہیں۔فیر اسی چوناں دی تیاریاں کراں گے۔ایس تڑی نوں شیخ ہوراں دی فریسٹریشن سمجھیا جائے یا فیر اک ہارے ہوئے جواری دا غصہ، پر عدالتی فیصلے توں پہلاں اجہے بیان پٹھے وی پئے سکدے نیں۔ اپنی گل نوں ہور ودھاندے ہوئے انہاں آکھیا کہ جے فیصلہ کرپشن دے خلاف نہ آیا تے لوک بغاوت ول ودھ سکدے نیں۔مطلب کہ جے ساڈے خلاف فیصلہ آیا تاں اساں تھریک خلافت چلاواں گے۔انہاں دسیا کہ اساں فیصلہ خلاف آون بعدوں دی حکمت عملی بنا چکے ہاں۔اپنی خیالی بغاوت وچ پارٹنرز دی تلاش وچ انہاں الطاف حسین نوں وی دانا پا دتا۔انہاں آکھیا ہلے کراچی وچ الطاف حسین دا ووٹ بینک ٹٹا نہیں۔اوہ اپنے ولوں ریاست دی ”پوچھل“ تے پیر رکھ کے فیصلہ حق وچ لین دا آہر کر رہے نیں پر ایس نال اوہ عمران خان دی مصیبتاں ودھارہے نیں۔ شیخ ہوراں آصف زردادی خلاف گل نہ کرن ایہہ ہو نہیں سکدا۔انہاں دعوی کیتا کہ زردادی پنجاب وچ ووٹ نہیں لے سکدا۔ایس داایہہ مطلب وی ہے پئی انہاں نوں پی ٹی آئی دی پنجاب وچ صورتحال خراب ہوندی وی نظر آرہی ہے۔ تلہ گنگ دا فیصلہ ویکھ کے ہی اوہ ایس پروگرام وچ آئے سن۔