لاہور(مانیٹرنگ رپورٹ)خیبرپختونخوا دے آئی جی پلس صلاح الدین مسحود عدالت نوں دسیا ہے کہ 80 فیصد کھوج مکمل ہوچکی ہے۔ اساں جلد ہی چلان پیش کردیاں گے۔ ایہہ مقدمہ سپریم کورٹ دے از خود نوٹس تے شروع ہویا کیونجے مشال خان قتل نے ریاست نوں اندر توں ہلا کے رکھ دتا سی۔ چیف جسٹس آف پاکستان جسٹس ثاقب نثار آپ ایس مقدمے نوں سنن والے ترے رکنی بنچ دی سربراہی کررہے نیں۔ 27 اپریل ایس مقدمے دی اگلی پیشی ہے۔ عدالت سانجھی کھوجی ٹیم (جے آئی ٹی) نوں وی اپنی ہفتہ وار رپورٹ سپریم کورٹ وچ جمع کروان دا حکم دے دتا۔ جوڈیشنل

کمیشن بناون دی گل خیبر پختونخوا دے وزیر اعلیٰ پرویز خٹک عمران خان دے بیان بعدوں کیتی سی۔ خیبر پی کے دے ایڈیشنل ایڈووکیٹ جنرل عدالت نوں دسیا کہ دو ایف آئی آراں پاروں 28 ملزمان دے ناں شامل سن اتے انہاں وچوں 24 پھڑیچے گئے نیں۔ عدالت نوں ایہہ وی دسیا گیا کہ ایس پی پلس دی زیر قیادت، سولین حفیہ ادارے آئی بی تے پلس افسراں تے مشتمل جے آئی ٹی تقریباً کھوجی رپورٹ مکمل کرچکی ہے۔ راتی خانزادہ دے ٹی وی پروگرام وچ دسیا گیا سی کہ تحریک انصاف دے کونسلر عارف مردان نوں وی پلس پھڑلتا ہے جس دع ویڈیوز وی سامنے آچکیاں نیں۔ پر ایس کونسلر نوں پھڑن دی خبر پلس بریک نہیں کیتی۔ نہ تے ہلے پھڑیچے 24 بندیاں دی سیاسی شناختاں دا کوئی دس رہیا ہے اتے نہ ہی ایہہ دس رہیا ہے کہ باقی چار کون نیں جہناں نوں پلس اج تیک پھڑ نہیں سکی۔ رات نوں جیہڑی اک ہور ویڈیو سامنے آئی ہے اوس وچ پلس دی وڈی موجودگی نظر آرہی ہے اتے اوس دے نال نال مشال دے قاتل گڈیاں دی تلاشیاں بڑے آرام نال لے رہے نیں۔ ایہہ سب پلس دے کردار ول وڈے اشارے نیں۔ یونیورسٹی دی پرائیوٹ سیکورٹی والیاں کیہ کردار ادا کیتا ایس بارے وی ہلے میڈیا وچ کوئی گل نہیں ہوئی۔ پر قتل دا اعتراف کرن والے ملزم وجاہت سیکورٹی انچارج بارے دسیا ہے کہ اوس وی وجاہت نوں مشال دے حمائیتاں نوں وی مارن دا آکھیا سی۔پلس دی موجودگی وچ منڈے کنج تلاشیاں لے سکدے سن؟