لاہور(مانیٹرنگ رپورٹ) امریکہ حکومت دا کہنا ہے کہ قطر تے ایس دے خلیجی ہمسایہ ملکاں دے درمیان جاری جھیڑا ’اک فیملی معاملہ‘ ہے۔ پریس سیکریٹری شان سپائسر نے ایہہ گل صحافیاں نوں اک آف کیمرہ بریفنگ دے دوران کہی ہے۔ یاد رہے کہ حال ہی وچ چھ عرب و خلیجی ملکاں نے قطر تے دہشت گرد گروپاں دی مدد کرن تے خطے نوں غیر مستحکم کرن دے الزام لاندے ہوئے ایس توں سانگے توڑ چھڈے سن جدوں کہ قطر انہاں الزاماں توں انکاری ہے۔ سفارتی سانگیاں دی بحالیاں لئی انہاں ملکاں ولوں پیش کیتے گئے مطالبیاں وچ ٹی وی

چینل الجزیرہ تے ترک فوجی اڈے بند کرن توں اڈ ایران توں سانگیاں وچ کمی دا مطالبہ وی رلتی ہے تے انہاں تے عمل لئی قطر نوں دس دن دا وقت دتا گیا ہے۔ ایس جھیڑے وچ قطر خلاف لڑن والے سارے عرب ملک امریکہ دے بہوں نیڑے نیں ۔ہن تک انہاں مطالبیاں دے حوالے نال امریکی وزیرِ خارجہ ریکس ٹلرسن نے باضابطہ طور تے کوئی بیان نہیں دتا ہے۔’’جے ایس گل بات وچ مدد کر سکدے ہاں تے چنگا ہے پر جے اوہ چاہندے نیں کہ اوہ ایس نوں خود حل کرن تے ایسا ہی ہونا چاہیداہے‘‘۔ جے ایہہ کوئی خاندانی جھیڑا ہے تے فیر سعودی عرب دا سٹینڈ کتھے گیا؟ اینج تے وائٹ ہاؤس انہاں تیرہ مطالبیاں دی وی آپ نفی کر دتی۔